مات بيحلم //شعر : أشرف الفضالي

مات بيحلم

fadali copy

مهداه إلي شهيد المحلة
أحمد علي مبروك

شعر : أشرف الفضالي

كان بيحلم

يعمل ايه

لكل واحدم الجيران

لما شمس الحب تدخل

م البيبان

تمسح أسامي المنبوذين

من ع الشريط

وف إيده خيط

ينسج في قلب الرمله غيط

ضل و أمل

وبيملا بالحب القلل

لجل الجيران المطحونين

للحب كان حارس أمين

يلضم من الحب السبح

ينسج من الصدق الطرح

يحكي الغناوي من جديد

بحروف طريه وطيبه

ما تقولش نوح بالمركبه


********

عمره ما يوم وسخ قميص

بتراب شوارع حتته

كات الرجوله شامه

بتزِين جتته

لا ف يوم خرج زي الصحاب

حافي بيلعب في التراب

ولا يوم شيطان { النت}

وَزُه ع الخراب

كان يوم ما يخرج

لجل شئ واحد وبس

لا ينور العقل بمداد العلم

في الدرس اللي جنبه

لا يطهر القلب بصلاه

تغفر له ذنبه

اللي لسه ما اتعملش

ما هو أصل بينه وبين شيطاننا

حيطه سد

عايش بجد

زي الحقيقه اللي في عز الحر

ضِلّه حنينه

في البرد شمسايه ودفا


*******

وف يوم ما لبست شمسه


فستان النهار

قام ابن حارة الطيبين

علي صوت دمار

وشويه من جند الحصار

اللي بدعوى الأمن

فارضين الوصايه
ع المحله

فاضين بكارة كل شارع

كل ملّه

بيطاردوا في شوية مجارم

مطلوقيــــــــــــن

يمكن من الجوع الدفين

يمكن من الأمن الأمين

اندسوا وسط الطيبين

وعشان ما تكتمل الروايه

والحكايه

تبقى محبوكه تمام

طلقوا الرصاص

من غيـــــــــــر لجام

صادوا الهمــــــــــــــــام

لحظتها كان الفجر

بيمصمص شفايفه المجروحين

يصرخ يا أحمد …..

رحت فيـــــــــــــــــــن ؟ !!!

ما هو أصل أحمد ابن موت

الطلقه صرخت في الوجود

بقى موت بيقتل

في الخلــــووود

سقطت حدود

عصرت ألام الموت

علي قلب الزمن

دا شهيدنا يا ظالمين

ما لوش أبدا تمن

*******

يا أمننا !! يا
أمننا !!

يا اللي سلاحه مكحله بدم العيال

شِدّ الرحال

روح من هنا

انت وآثارك كلها

خلينا نبدأ من جديد

يمكن نحقق حلم كان

بيراود احمد من زمان

ما هو أصل أحمد كان بيحلم

إن بلده تقوم وتنهض

إن كف الحق يعرض


مـــــات بيحلم

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s