يالهوي يا مه يالهوي يا مه// كلمات حسين راشد

يالهوي يا مه يالهوي يا مه

كلمات حسين راشد

يالهوي يا مه.. يالهوي يا مه
دول همه همه تاريخ في كلمة
اللي يعاديكي بيكون في قمة
واللي شاريكي داق المذلة
يالهوي يا مه يالهوي يامه
تختيخ وتوختوخ تكتيك وتوكتوك
ولا عدنا عارفين مين بيخنوق
الكل سارح في الزحمة سايح
و ان قلت فاهم هتموت بتوكتوك
يالهوي يامه
طلعوا كلابهم بيعووا تاني
نهشوا في لحمك قال أيه أغاني
و يجي يمك تديله عظمك
و أجي جنبك مالقاش سناني
يالهوي يامه .. يا لهوي يامه
تتار و تتروا و تتر تاتي
حبه أمركا على حبه كاكي
يقضوا المهمة أل أيه معاكي
ولما أقولك حاسبي يامه
ألقاكي ضمه في حد تاني
يالهوي يامه يالهوي امه
جدودي زرعوا فيكي الأمانة
و كنتي ليهم سند الكهانة
دلوقت ليه العلم فيكي
مرمي يا مه على الزبالة
يالهوي يامه
عيالنا صبحوا في العلم جهلة
ومعلمينك تجار في ملهى
ياخدوا العيال م الروضة لما
يخرجوهم عن أي ملة
يالهوي يامه يالهوي يامه
ولادنا صبحوا تختوخ وتختخ
عمالين شقاوة عجين و لبخ
بيربوا فينا ما احنا انتهينا
قنوات وفاضية فضاءات بتمسخ
.. يالهوي يامه
حتى الصحاب ما بقوش يصاحبوا
ماهو كله قاعد على قلب أهله
وشيشة شاشه و البانجو باشا
و النت خلا الصحاب يوشوا
يالهوي يامه يالهوي يامه
البت قاعدة في البيت تشييت
وشاشة رخمة خلتها قلعت
سايبه خطيبها بتلاغي غيره
و أدبها يظهر بس في وشه
يالهوي يامه يالهوي يامه
محاميل في وسط الكل شامه
لا عاد مروءة ولا فيه شهامة
حتى اللي مش لاقي لقمة
جاب الخطوط بدل البيجامة
يالهوي يامه يالهوي يامه
اللقمة ضايعة والناس غلابة
و الزحمة خلت الناس في غابة

ما حد فكر إزاي هنزرع

كمان و نسيوا يوم القيامة
يالهوي يامه
الصحة صبحت سرطان مسرطن
برد الفراخ .. خنازير و الاغرب
عيا البهايم بقى في ابن أدم
و ابن أدم ما بقاش مكرم..
يالهوي يامه يالهوي يامه
فيروس مفرز فايز وفايزة
والسحب كله على أي جايزة
واخدين فلوسنا في ألو 8
أي اختيار رابحين فلسنا
يالهوي يامه يالهوي يامه
قصر الثقافة مكسور مكسر
و الأدبا صبحوا الهم الأكبر
واقفين يصارعوا في أي كلمة
ولا حد فاهم ولا حد فكر ..
يالهوي يامه يالهوي يامه
وفنانينك قلعوا الرسالة
والرقص أصبح أعظم أمانه
والقدوة ليهم عاهر و عاهره
و شيوخ بتفتي في فطام زماله
يالهوي يامه يالهوي يامه
مهندسينك بقوا ع الطوالة
مشروع تخرج على كوم زبالة
فاردين مثلث تنجح هتفشل
وان قلنا عيشته تبقى استدانه
يالهوي يامه يالهوي يامه
فلاحنا باع وصبح معترس
لابس لباسه و قاعد يأمرز
والارض راحت للبور بدمعه
و أنا والبهايم قاعدين نبصبص
يالهوي يامه يالهوي يامه
مصانعنا صبحت تكهين وكهنه
و الشغالين في كل ركنه
عاملين مظاهرة لازم هنقبض
حتى النضال بقى سكة ساكه
يالهوي يامه يالهوي يامه
سلاحنا نام و نمنا جنبه
والواد حسام صدى في كُمه
بقى بلاستيك دولارين في استيك
و عدو أخويا ما بقاش عدوه
يالهوي يامه يالهوي يامه
سنتين تلاته ..خميس وجمعه
و باراك أوباما قالها في جامعه
سلام عليكو .. بس نعاديكو
و الجهلة عايزين نسخه منه
يالهوي يامه يالهوي يامه
هقولها كلمة يامه هقولها
الناس في سكة وأنتي في سكة
مليون يالهوي ما يكفونيشي
و عشان تعيشي قوليها يامه
قوم ياخويا وقومي يا ختي
خلينا نبني .. مش بس نبكي
خلوا دموعنا تبقلنا زرعه
الكلمة شجرة و الحكمة زلعة
بلاش يالهوي وبلاشها يامه
كل المرارة لو ترجعيلنا
تبقى حلاوة فوق الحلاوة
بس نشوفك راجعلنا يامه
كبيرة زي ما كنتي دايماً
عظيمة يامه فوق كل محنة
كبيرة يامه و اخواتنا احنا
لو تجمعيهم و تدفي فيهم
هتبقى كلمتنا في ريحنا
هننسى يامه كل جراحنا
واحشنا لمة عيشك وملحك
ملعون أي تيك أواي يذلك
الدقة يامه والمش منك
أطعم من جاتوهات فرنسا
عظيمة يامه عظيمة يامه
بس ارجعيلنا بسرعة يامه
بس ارجعلنا بسرعة يامه

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s